منشور برس موقع اخباري حر
هذه القصيدة لاحد ثوار سبتمبر ابو عادل العقيد علي العولقي من رداع (الدواعش اليوم عند الحوثي وامثاله) يتحدث فيها عن اوضاع البلاد في عام1972 ويقسم بانهم لن يخذلوا ثورة سبتمبر وتعتبر القصيدة ملحمة تاريخية فاقرؤوها واستحثوا هممكم لنستعيد ثورة سبتمبر
يا الله يامن لك السلطان والقدرة
عبدك ترجّاك تجري اللطف بالمقدورْ
بحق طه ومن شدّيت به أزره
لاهنت منصب ولاشفيت به منذورْ
وكل من قل لا مسته عثره
يا الله تقيمه، وردّه خاطره مجبورْ
لاتترك النسرْ مقصوص الجناح حسره
في مخدعه والفضاء يلعب به العصفورْ
وفكّ أسر الأسد ذي طال في أسره
يرجع عرينه يذود الثعلب المغرورْ
***
يقول أبو عادل الهاجس دفر دفره
في ليل طائل حسبته في الجبل مسمورْ«1»
من طول ما أمتدّ خفت أغتر في فجره
ولايبان الضياء عندي من الديجورْ
وقال لي طول هذا الليل لك عبره
تعرفْ مقام النهار لاتحسبه مهذورْ
يارب سالك تبدّد هذه الغدرة
بصبح باهي يذكرني بلون النورْ
جوّب عليّ هاجسي بأبيات من شعره
وقافية تفرز الشاعر من الشعرورْ
يافجر ياحلم أبو عادل طنن دهره
يامنة أجيالنا يامطلب الجمهورْ
بديتْ والطلّ عاده قبل الزهره
وارتش في خدّها كاللؤلؤ المنثورْ
والورد حسّ الندى وأهدى النسيم عطره
والجولبه «2» ساجعه بتناجي الشحرور
والله يافجر مهما طالت السفره
لابدّ منك ولو كان الطريق موعورْ
لو بانخضِّب طريقك بالدما الحره
ونفرشه من جماجمنا ونبني سورْ
بديتْ في فجر سبتمبر مع البُكره
في يوم طايل من أيام اليمن مشهورْ
كل النجوم أحجرت وغنّت الزهره
وتلفّت الدهر لاخلفه وهو مبهورْ
وظنوا الناس «تبع» قام من قبره
وعاد يبني على سطح الكواكب دورْ
وأخي المهاجر من المهجر دغر دغره
على جناح الأمل يبزّه الطيمورْ«3»
حتى قبور الذين ماتوا في الهجره
جاءت من الشوق تقبل قبل نفخ الصورْ
والشعب هلّلْ وكبر وانشرح صدره
ظن أن ماشي غدره من قفا ذا النورْ
ظلاَّ يغني في المقيل وفي السمره
بالبال والدان والمزمار والطنبور
لا ما نسي في البناء ذي شيده ثغره
ما شافها حين ظلا في الفرح مغمور
وجوا لنا منهم ذي لاثوا السمره
حد قال أنا شيخ وحد قال أنا مأمور
حد قال أنا ذي نسفت القصر من جذره
وتجي وهو كان مخبي في السفل«4» مذعور
رص الرتب من قفا الزند للحتره
وأنزل بنات نعش إلى كتفه فعلها درور«5»
وجر كرباج «6» من اتحاكى قرش ظهره
مثل أحمد الشوربان«7» الفارس المشهور
والثاني أقبل يقول أنه وحيد عصره
قال أنه احتل صعده لا بلاد احجور
بعده رجال أهل عاما وأهل أبو مره
يشتي وزاره زحف من لحقته للثور
وتجي وهو كان مع من زيد الأجره
ساعة معاهم وساعة ضدهم مأجور
والثالث أقبل يقول أنه فريد دهره
قال إنه العقل ذي دبر وسوّا الشور
وتجي وهو قال يوم الشور أنا هجره
لما تولى عوج تلمه وشد الجور
والرابع الجامعي وفى لها الجغره
فصيح في النقد لكن في العمل معذور
من فندق الشرق لا باب فندق الزهره
إن قلت يسعد صباحك قال لك بنجور«8»
ليته تحلبط ولا تمت له السفره
كنه قفا الثور يزرع حقله المهجور
والليل عود وليل الليل والغدره
وإن المريض انتكس وتضرر المضرور
واتسلل الثعل فيده راية الثورة
وخلفها سيف «ياجناه» و«المنصور»
وأمسى يلاحق ديوك الفجر بالقصره
حد عضعضه وحد قصقص له الشنقور
ماشي عليّ لوم لو نويت للهجره
هارب من الثعل لاقع في يده مأسور
الحر لا شاف ما يشنأ وما يكره
ترك بلاده وخلف واديه والدور
والصقر لو شاف ما يشنا هجر وكره
وألقى فروخه وفارقها وهو مقهور
وطار لا حيد وإلا لا خلا قفره
من بعد ما كان في عشه سعيد مسرور
يا باطل اليوم يا غبنه ويا قهره
من باطل البقعة ومن سخرية المغدور
النوق فيها تهيج وتزيد الهدره
والهيج هادن منتكس حترته معقور
قرن الوعل في حفاته حيث كان ظفره
وأطرافه نبت حيث القرون اظفور
لكن علي عار نبش قحطان من قبره
وهز تبع وحمير جدنا المشهور
ما نتركش يا أرضنا لو تعظم القدره
لو يرجع الفحل ناقة والفحال نمور
ما نتركش ساعة الضيقات والعسرة
ونفلتش والدسائس داخلش بتدور
نهاية الآدمي مهما طول عمره
في جرف عرضه ذراع إلا ربع محفور
ساعه بعزه تكفي الحر من دهره
ولا مية عام يحياها ذليل مقهور
باطل شقي شقَّ حيد «اسبيل»«9» من جذره
وأمسى شقيقه «عصر» من شدته معصور
حرام ياحرم تظلي شامز النخره
جالس تعصب جنازة عودها منخور
ياعيب عيباه من «عيبان» كم صبره
يشاهد الجور ما حتى احترك شنظور
كنه نسي يوم تزوج كم شرط مهره
وكم تركنا ذهب في مفرقه منثور
ذكرت «نهدين» وتنهدت في حسرة
هدت جدار الفؤاد أمسى وهو مقصور
قم يا «نقم» بانقم ونعود الكره
للتلم ذي سبروه اعوج نرد الثور
وقل لغمدان يطلق من حموا ظهره
وردوا الخصم عنه من عراض السور
ويجوا معانا ونحمل راية الثورة
ونبشر الشعب بالشورى وبالدستور
يا شوقي أشواق من نجران إلى شقره «10»
ببارق الصيف يبشرني بالوطن ممطور
لا ما حضرته فلا زدت البس الوزره
وسقي القلب لما أرويه بالمعشور
ختمت قولي وهذا بعض من زفره
…………………………
لو طار منه شراره من طرف جمره
تحرق جهنم ويوحيها المحيط ويثور«11»
والختم صلوا على أحمد باهي الغره
جد الحسن والحسين ذي دلنا للنور
